Reita lyugšonas

+ Dīva Tāva un Dāla, un Svātō Gora vōrdā.
Amen.**
Apgaismoj mani, Dīvs, ar īkšejōs gaismas spūdrumu.
Vodi munas dūmas un munu grybu, lai
es varu Tevi cīneigi gūdynōt un Tev pasateikt, jo
Tu esi muns Radeitōjs un Tāvs.
Es pīlyudzu un mīļoju Tevi, muns Dīvs, Tova
bezgaleigō lobuma un svātuma dēļ.
Es Tev pasateicu par vysom žēlesteibom, bet
seviški par tū, ka maņ un vysim ticeigīm esi
parōdejis lobu un taisnu ceļu uz Tovu myužeigū
vaļsteibu.
Styprynoj mani, Dīvs, lai ikdīnas dorbūs un
gora sausumā napagurst muna dvēsele. Atbreivoj
munu sirdi nu vysom navajadzeigom ryupem
un ilgom, lai uz vysu pasauleigū es
raudzeitūs kai uz pōrejūšom lītom. Dūd maņ,
Kungs, dabasu gudreibu, lai es īsamōceitu
vyspyrms Tevi meklēt un atrast, Tevi arvīn
vairōk mīļōt un gūdynōt.
Kungs, es nūvēleju Tev vysu, kū vīn es dareišu
šudiņ, reit un vysā sovā dzeivē. Taipat nu Tovom
tēviškom rūkom es grybu pījimt vysu, kū sovā
dīviškajā apredzeibā maņ esi nūlēmis. Vodi
mani, Kungs, un uzturi sovā žēlesteibā, jo Tev es
grybu pīdarēt tagad un myužam.